هذه المدونة

تم إنشاء هذه المدونة مع بداية اضطراب خدمة الفيسبوك في مصر خلال الأيام الأولى لثورة خمسة وعشرين يناير المجيدة، ونشرت معظم المواد الموجودة عليها خلال انقطاع الاتصالات منذ يوم ثمانية وعشرين يناير ولعدة أيام، وبعد معاودة خدمة  الإنترنت لم يستأنف نشاط النشر على هذه الصفحة.
نأمل ألا تضطرنا الظروف إلى استخدام المدونة لنفس الأسباب
وأن يتم استئناف النشر في ظروف أخرى بهدف التوعية وتبادل الآراء

عاشت مصر حرة

في انتظار رحيل الديكتاتور

عن الإندبندنت

اليوم السادس

عشرات الآلاف من المتظاهرين يواصلون الاحتجاج لليوم السادس (30-01-2011) الحرية.. يسقط حسني مبارك

أخرج يا ديكتاتور

يسقط حسني مبارك

شاهد فيديو ضحايا أجهزة الأمن الغاشمة
http://www.youtube.com/watch?v=XzLBCV-cwjg&feature=player_embedded#

مخاض الحرية

كيف سيولد المستقبل؟

وكمان الله عليك يا مصر

الله عليك يا مصر

Friday 28/01/2011 الجمعة

وأخيرا لا استجابة من الشعب المصري.. لا خوف.. فقط احتجاج.. وترقب

إلى جيش مصر

إلى الجيش المصري.. كن شريفاً كما عرفناك، لستم تابعين لرجال الأعمال الفاسدين، دوركم حماية الجمهورية، وليس رئيس ضلت سياساته نحو الهاوية.. كن شريفاً، كل مصري يحب جيش مصر، ويحترمه.. أنتم تعلمون ذلك.. لستم تابعين.. كونوا شرفاء

مصر النهاردة.. تقترب كثيرا من الحرية

استشهاد شاب في مظاهرات السويس

شاهد على يوتيوب

http://www.youtube.com/watch?v=rhfpLgrdl7g&feature=player_embedded

Time Marshall الأحكام العرفية فعليا دون إعلان رسمي

the Egyptian regime has shut down Facebook, Twitter, YouTube, Blackberry, and SMS. We expect tomorrow's media/communication blackout will be worse. You'll have to cover our backs, you'll have to spread the news around the world.

كيف تفتح فيسبوك؟

استخدم هذا اللينك
http://security.ngoinabox.org/ar/

من السويس- تصوير خالد دسوقي- وكالة أ ف ب وجتي

مفاجآت المتظاهر أحمد

انتشرت على موقع "فيس بوك" مشاركة بعنوان (الشعب...يريد...اسقاااط النظام) التي كتبها أحد الشباب المتظاهر

في ميدان التحرير يوم 25 يناير، هو الشاب أحمد عبد الحميد، التي كتبها في ساعة متأخرة بعد رجوعه من المظاهرات.
المشاركة عبارة عن ملاحظات أو كما كتب مفاجآت، عاشها على مدار ساعات "يوم الغضب".

المشاركة نعرضها كما هي دون تدخل، فقط نشير إنها من شاب مصري إلى شباب مثله..

سلسلة مفاجآت

أنا لسة راجع من المظاهرة، تعبان جدا وعندى برد من المية اللى رشوها علينا، ده كله مش مهم، اللى شفته لازم يتحكى، ويتنقل بين الناس كمان..

انا مش هاكتب بالفصحى، مافيش حيل.

اللى شفته النهاردة كان سلسلة من المفاجآت العظيمة ، العظيمة بجد.

المفاجأة الاولى: عدد الناس كان كبير جدا زى ما شفتوا على التليفزيون ، كله كان فاكر انه رايح لوحده ، و الباقى كالعادة قاعد فى البيت ، بس لأ، مش ده اللى حصل.

المفاجأة التانية ان معظمهم شباب، و فرافير، بتوع الفيسبوك ، شكلهم يدل على راحة مادية نسبيا ، وناس كتير من مهن كتير، شفت زملاء فى الكلية ماشفتهمش من عشر سنين فى المظاهرة دى ، غريبة ان دول اللى نزلوا مع انهم فى معظم الاحوال مش مطحونين أوى زى بقية الناس.

المفاجأة الثالثة: على الرغم من ان معظم الناس شباب بس كان فيه كبار و ستات فى الخمسينات و ما شيين على مهلهم كده، و مش قليلين ، كتار، و كان فيه ناس ماشيين بولادهم.

المفاجأة الرابعة، كان فيه بنات معانا ، أو عشان أكون دقيق كانوا اكتر مننا فى الجروب بتاعنا ، و بنات فرافير من اللى تشوفهم فى الشارع تقول دول متربيين فى شرنقة دهب ، و مايعدوش الشارع لوحدهم ، بس ايه رجالة ، و جدعان ، بنات بس رجالة ، مش عارف ازاى.

المفاجأة الخامسة، كنا خايفين على البنات ان حد يتحرش بيهم ، ما حدش ، كله كان محترم ، و خايف عليهم اكتر مننا ، ده دليل ان التحرشات اللى بتحصل من مدسوسين من الداخلية.

المفاجأة السادسة: ما فيش عنف، خالص خالص ، و لما ناس بدأوا يهاجموا عربيات الامن المركزى اللى رشوا علينا مية، بدا كله يهتف: سلمية، سلمية ، سلمية.

المفاجأه السابعة: لما و صل الاعتصام التحرير و قعدنا فى التحرير، فيه ناس بعد كده بدأوا ينظفوا الميدان من المخلفات عشان الناس تعرف اننا متحضرين.

المفاجأة الثامنة: بصيت على الحتة اللى كنت فيها فى الميدان لقيتها نضفت فعلا!

المفاجأة التاسعة: بنت معانا ماكنتش اعرفها بتحلف بالمصحف و بالنبى عرفت انها مسيحية ، الغريب انه مابانش!!! ليه؟ عشان كلنا بنحب بلدنا و بنهتف عشان تبقى احسن ، فما بانتش الفروق الطفيفة دى.

المفاجأة العاشرة: مقدار النشوة و الفخر و انت يتهتف باسم مصر باعلى صوتك "مصر...تصفيق قوى..مصر...تصفيق فوى"، البلد اللى المفروض انه وطنك، و بتحلم طول عمرك انك تعيش فيه بقية عمرك، من غير ما حد يتهمك أو تتهم نفسك بالعاطفية و الحمق ، أخيرا بتعلن انك بتحبه ، ومن غير خجل.

المش مفاجأة الحادية عشر: فى و سط الخوف و القلق من اللى ممكن يعمله الامن ، تبص للسما و تهتف مع عشرين أو تلاتين الف و تقول الله أكبر و ياااااااارب، و تطمن ، لانك نصرته ، فهو أكيد هاينصرك، وقد فعل و له الحمد و الشكر.

المفاجأة الثانية عشر: جميل منظر الناس و هم فى وسط ده كله يتجمعوا و يصلوا جماعة.

المفاجأة الثالثة عشر: شباب مصر شباب زى الفل، من غير مبالغة، و بكل ما فى الكلمة من معان: شهم، جدع، بيحب بلده، واعى و فاهم جدا ، وربنا فى قلبه.

المفاجأة الرابعة عشر: أقوى هتافات كانت بتجمع الناس كانت هى الموجهة لمبارك ، و النظام ، الشباب فاهمة أوى و عارفة فين المشكلة ، الهتافات التانية ماكانتش بتلاقى نفس الحماس.
المفاجأة اخامسة عشر: شفنا ابراهيم عيسى و الناس بتشيلوا على الاكتاف، و حبهم ليه ظاهر وواضح، و قابلت نوارة نجم، و سلمت عليها، و كانت مدمعة من الفرحة من جمال و بهاء اللى شايفاه، فعلا، المحترم محترم فى كل حاجة ، و اللى بيرضى ربنا مش نفسه، ربنا بيديله كتير ، كتير أوى.

المفاجأة السادسة عشر: احنا بفضل الله خيطنا الجيزة، و كل ما يحاولوا يوقفونا يلاقوا العدد كبير و يفتحوا، مصطفى محمود، شارع جامعة الدزل ذهابا و ايابا، البطل احمد عبد العزيز ، ميدان الدقى، ، شارع التحرير، الاوبرا، ميدان التحرير..

كتير كنت باحس انى خايف و مش عايز اتضر، بس مافيش خيار آخر، ده باطل و ظلم ، ولازم نحاربه، ربنا أمرنا اننا نحاربه ، لانه مش خالقنا اعتباطا، لو كان خالقنا عشان نعبده و نستمتع بنعمه، و خلاص، يبقى فين الفايدة ، ربنا خالقنا عشان نعمر الارض، و نستعمل نعمه فى ان احنا نحارب الظالمين و ننشر العدل، و هو قالنا من الاول ، عمرك و رزقك بايدى مش بايد حد تانى ، انطلق انت بأه ولا يهمك.

اكسر خوفك و انضم للي بيدافعوا عن الحق ، مسلمين أو مسيحيين، مش بتحلم ان ولادنا يكبروا فى وطن؟ يكون همهم اختراع كبير بيعملوه فى جامعة محترمة، أو كتاب معقد بيألفوه، بدل ما احنا مستهلكين فى العيشة و اللى عايشينها، و الشغل التافه اللى كلنا بنعمله، ايوه تافه، انت يا الا دكتور عارف انك اتعلمت اى كلام و بتوع بره احسن منك بمراحل او مهندس زيي ما يحلمش انه يعمل شىء معقد، كل اللى بيعمله اتعمل قبل كده خمسين مره مع فرق التفاصيل الغير مهمة، و لو عايز فلوس اشتغل فى البيع واللا التسويق ، أوتلاقيك بتعلم فى جامعة و عارف ان اللى بتعلمه مضى زمنه و حتى لو كان كورس كويس انت متأكد ان تلاميذك مش هايشتغلوا بربعه، لانهم هايتخرجوا يشتغلوا فى الكلام الفاضى اللى احنا بنشتغل فيه (ده لو اشتغلوا)، ما عندناش ناسا و لا هارفارد و لا كليفلاند و لا ام أى تى، انسى. انا لما بابص لابنى اللى عنده شهر بافكر لو ربيته كويس هل ينتهى زيى، مشغول بالقرف اللى بيحصل، و غالبا هاينضم لاى حركة، عشان يطلع الغل اللى جواه، و الله أعلم ايه اللى هايحصله، يا الا اربيه أى كلام فيطلع حرامى أو حزب وطنى، يا الا يسافر و اشوفه كل سنة مرة ، يا الا اتكل على الله و احاول انى اصلحله البلد.

الاخبار ان الامن فض الناس فى ميدان التحرير، ما اعرفش ايه اللى هايحصل بكره أو بعده أو بعد شهر، الناس دى زينا ، بيتظاهروا عشان الظلم بيوجع ، و بيئلم، فيه ناس ماتت ، و فيه ناس اعتقلت و لسة هايكملوا ، عشان الحرية و الكرامة طعمهم جميييييييييييييييل ، روح خليك معاهم، خليك مع الحق ، سواء فى ميدان التحرير، أو فى أى حته فى المستقبل، ما تنساش ان كله بايد رب العالمين، رزقك و صحتك وعمرك، و لو ما كانش اللى ماتوا فى المظاهرات ماتوا شهداء النهاردة، كانوا برضه هايموتوا فى نفس المعاد فى حادثة هابلة، أو أى حاجة من الحاجات اللى بتموت الناس فى مصر لاتفه الاسباب.

المفاجأة الاخيرة، نسيت أقولها معلش: مصر بلد محترمة شعبها حى و بينتفض عشان كرامته، و ظهر على الجزيرة أخيرا و هو بيصرخ و يقول ،وش كده من غير لف ولا دوران: "الشعب...يريد...اسقاااط النظام".

بيان عن جمعة الغضب

يوم الجمعة 28/1/2011 هو يوم تاريخي مش هيتنسي وهيتدرس لولادنا في كتب التاريخ . انزل وخلي اولادك واحفادك يفخروا بيك وإنت سايبلهم بلد يقدروا يعيشوا فيها بحرية وكرامة. افتكر إن احنا مش عايزين نكسر ولا نضرب العساكر والظباط احنا عايزين اسقاط النظام. خلي المظاهرة سلمية وامنع أي حد مدسوس انه يفوت علينا الفرصة العظيمة ديه. وافتكر إن الجنود والظباط دول مصريين زيناومطحونين زينا وحاسين باللي احنا حاسينه وفيه كتير منهم مستني أي دفعة عشان ينضملنا زي الضابط اللي رفض يضرب المتظاهرين وانضم لينا يوم التلات . المظاهرات هتبدأ من كل الجوامع والكنائس في مصر بعد نهاية صلاة الجمعة إن شاء الله.

إييه اللي ممكن اعمله قبل يوم الجمعة؟

1- اعمل tag ل كل أصحابك على صورة للمظاهرة في ال facebook بتاعك.

2- ارسل e-mails على قد ماتقدر من هنا ل يوم الجمعة تعرف الناس بالمظاهرات وتحثهم على المشاركة.

3- عرف كل الناس اللي حواليك بالمظاهرات وحاول تتفق إنت واصحابك على الذهاب مع بعض.

4- ابعت على الاقل 10 sms ل أرقام عشوائية وادعوهم للنزول.

اخد ايه معايا وأنا نازل يوم الجمعة ؟

1- علم مصر أو أي لافتة مكتوب فيها رأيك بشكل محترم .

2- البس لبس تقيل ومريح في نفس الوقت عشان احتمال نطول شوي ويا ريت يكون اسود عشان نلخبط الامن المركزي .

3- شنطة ظَهر .

4- زجاجة مية وسندويش.

5- قناع للغاز ,, لو معندكش شوف ازاي تعمل واحد http://www.facebook.com/photo.php?fbid=1830898818217&set=o.104224996294040

6- زجاجة كوكاكولا عشان تغسل بيها وشك لو رموا عليكم قنابل مسيلة للدموع .

7- سبراي اسود عشان ترش بيه زجاج العربية المصفحة اللي بتهاجمكم.

ايه اللي هعملوه يوم الجمعة ؟

1- افطر كويس قبل الخروج للصلاة.

2- روح المسجد أو الكنيسة بدري وفهم الناس كلها اهمية المشاركة في اليوم ده .

3- اتحلى بالامان وادعي ربنا في صلاتك انه ينصرنا .

4- بعد الصلاة ابدا المظاهرة وادعي الناس للتظهر معاكم عن طريق هتفات زي “انزل ,, انزل " " بطل بطل بطل خوف ,, عمر الخوف ما يأخر موت “ " 1,2, اهالينا فين".

5- متخليش المظاهرة تقف, دايما في حركة ولف في الشوارع عشان نكتسب أكبر قادر ممكن من الناس .

6- التوجه يكون ل اقرب ميدان عم عشان تقبل بقيت المصريين اللي من أماكن أخرى .

7- الهتاف الرئيسي لينا هو “الشعب يريد اسقاط النظام “

8- افتكر إن ملايين المصريين في كل حتة في مصر مش هترجع بيتها الى بعد مطالبنا تتحقق



المشاركين في الثورة : "حتى كتابت هذا البيان"



حركة شباب 6 أبريل

الحملة الشعبية لدعم مطالب التغيير

حزب الغد

شباب من أجل العدالة والحرية

جماعة الإخوان المسلمين

حزب الوفد

حركة حشد

حزب الجبهة الديموقراطية

رابطة البرادعي لدعم مطالب التغيير

حزب الكرامة

حملة دعم حمدين صباحي

الاشتراكيون الثوريون

البرادعي محمد الدكتور

الدكتور محمد البلتاجي

الأستاذ علاء الأسواني

والدة الشهيد خالد سعيد

الكاتب الساخر بلال فضل

المستشار محمود الخضيري

الفنان عمرو واكد

المخرج محمد دياب

وكل أحرار مصر

نداء للشرطة: لا تحسنوا التصويب

نداء

هذا ليس بياناً، وإنما نداء.

للسادة الإخوان ضباط الشرطة والعاملين بوزارة الداخلية، قفوا الى جانب الناس، النظام راحل، لكن الناس ستبقى و ستبقون معهم. لا أطلب منكم عصيان الأوامر، أنا متفهم تماماً حجم المسؤولية، فقط ترفقوا بالناس، لا تحسنوا التصويب، لا تصوبوا نحو الصدور والرؤوس، هناك دائماً حلول وسطية. لو أحصيتم المتحكمين فيكم لوجدتم أنهم لا يتعدون العشرة أفراد، بدونكم سيكونوا ضعفاء ولا حول لهم، أنتم سلاح الحكّام، كونوا سلاحنا لا سلاحهم، كونوا للناس لا للحكّام.

للإخوان عساكر ومجندين الأمن المركزي، أنت أخي، أنت سندي وعوني، الرجاء أن تقف إلى جانبي هذه الأيام،لا أقول لك اعصى أوامر الضباط، اسمع كلام الضباط، لكن لا تقتلني، لا تضربني بقوة، أريد أن أعود إلى منزلي سالماً، أريد أن أنظر في عينك غداً ونحن لا نزال أخوة، أنا لست مجرماً، أنا أخوك.

للسادة الإعلاميين الشرفاء، أحكمتم عملية التعتيم في اليوم الأول بأوامر من الحكّام، وبدأتم في كسر التعتيم في اليوم التالي، الرجاء استكمال عملية الشفافية بالكامل، الرجاء نقل أحداث الشارع ليعلم بها كل مشاهد، مشاركتكم في الثورة لن تتحقق بالنزول إلى الشارع، وإنما بنقل أحداثها. أثق في حكمكم وقدرتكم على اتخاذ القرارات، كونوا مع الشعب هذه المرة.

إلى السادة الأطباء والصيادلة، دوركم يتمثل في اسعاف الناس، الجرحى والمصابون يعتقلون فور دخولهم المستشفيات الحكومية، دوركم محاولة إسعافهم خارج تلك المستشفيات.

إلى السادة رجال الأعمال و أصحاب الأموال، قفوا إلى جانب الناس، لا ترحلوا. ومساهماتكم في الثورة تتمثل في الاستمرار في العمل والتواجد وخدمة الشعب.

إلى الفنانين والكتّاب والمشاهير، أنتم أحباؤنا، أنتم من تصنعون البسمة وتثيرون الفكر، قفوا معنا اليوم لتظلوا في قلوبنا إلى الأبد، قفوا معنا بإعلان تأييدكم للناس.

الى الناس، انزلوا إلى الشارع يوم الجمعة القادم، لا تخافوا من الضرب، لا تخافوا على أولادكم وأهلكم، ما تفعلونه سيضمن مستقبلاً خالياً من الظلم والفساد والفقر، حتى اليوم نزل أكثر من مئة ألف إلى الشوارع في مصر كلها، ولم يعتقل سوى ألف واحد، نسبة اعتقالك لن تتعدى الواحد في المئة. وهذه نسبة صغيرة جداً. الثورة لكم ولن تكتمل إلا بنزولكم.



لست عضواً في جماعة أو حزب، ولا أنتمى إلى تنظيم أوغيره، وإنما أخاطبكم بصفتى واحد من الناس.

بلا توقيع

ادعي 10 أشخاص معاك

من شاب فيسبوكي إلى كل مصري

وصلتني هذه الرسالة حول استعدادات جمعة الغضب

شبكة رصد :
http://www.facebook.com/album.php?id=769945463&aid=595489#!/RNN.NEWS

+قائمة أسماء المعتقلين منذ بدء يوم الغضب :

https://docs.google.com/document/pub?id=1femc4VpnPfgrVce9ZNE86byLb6mPLD0K-ZVhjbvAjNA&pli=1
ملحوظة : يجب أن يكون لديك حساب جوجل لتصفحه

+كاريكاتيرات الفنان البرازيلي كارلوس لاتوف المتعلقة بما يحدث في مصر :
http://www.facebook.com/album.php?id=769945463&aid=595489

http://amr-ezeldeen.blogspot.com/2011/01/newest-cartoon-by-latuff-exclusive-to.html

+rawda samy
حنقفل الموبايل من الساعة 7 للساعة 9
اولا دة اكتر وقت بيبقى فى اتصالات و لما نقفل الموبايل الساعتين دول
حنخسر ( فودافون - موبينيل - اتصالات ) مليارات
طيب ليه حنخسرهم ...!! لانهم حجبوا شبكات المحمول فى السويس واحنا حنتضامن معاهم
....انشروا رجاءا

+هذا هو سيناريو - غير مؤكد - وصلني و حين يتم تأكيده سأرسل لكم بذلك :

خطة يوم الجمعة :اتفق اغلب الناشطون في مصر على يوم الجمعة 28 يناير يوم ثورة مليونية لشعب مصر 1-كل فرد يدعو عشرة على الاقل للمشاركة ويرسل عشر رسايل موبايل ويدعو اصدقائه على النت 2-صلاة الجمعة اقرب مسجد لمنزلك وتكون لابس تقيل ومعك ماسك... تجيب...ه من الصيدليه عشان الغاز وفي جيبك ورق مكتوب عليه المطالب وعلم مصر وصور الشهداء خالد سعيد وشهداء السويس صلاة الغائب بد صلاة الجمعة التحرك مجموعات من الاحياء الى الميادين وليس العكس ودعوة الناس للانضمام اثناء الهتاف والسير ثم ربط التجمعات ببعضها عن طريق الموبايل والتحرك لاكبر ميدان ثم الاعتصام وعدم المغادرة حتى تحقيق المطالب ويراعى عدم رفع شعارات حزبية واليقظة التامة للمندسين من الامن وممنوع القبض على اي واحد مننا وفي حالة القبض على احد يسعى الجميع لتخليصه من ايدي الشرطة رجاء النشر........لو مش هتخرج ابعت رسايل لاصحابك

تحياتي
أحمد خشبة
شاب فيسبوكي